Ang Pagpadamo Sang Azolla

By Raul L. Ticar

Extension Director

Capiz State University

Backyard azolla farm of WESVARRDEC
Magsasaka Siyentista (MS) Gary Andrade of Banga, Aklan
supplies the feeds for the darag native chickens. 

Ang azolla nagalutaw kag nagadamo nga daw banig sa Ibabaw sang tubig, nagasanga kag sa ulihi nagasiparar kag mahimo nga bag-o nga tanom. Ang dahon sini may korte nga triangulo, masili  nga berde ang kolor, matimsog ang mga dahon.

Tungod sang iya madamo nga mga magamitan, dapat gid naton mahibaluan kon paano mapadamo ini.

Amo ini ang mga dapat sundon sa pagpadamo sang azolla. 

1. Magpili sang isa ka lugar sa uyapad ukon talamnan nga indi tama ka tampad sa init ukon magpili sang lugar nga ginahandungan.
2. Ipreparar ang talamnan pareho sa kon ikaw magtanom sang palay.
3. Mintinahon ang kadamuon sang tubig halin sa 5 – 7 centimetros ukon basta sa ikaduha nga linya sang natunga nga tudlo nga ang punta basta lang makatandog sa duta.
4. Isab-og ang preska nga azolla sa kadamu-on nga 200 gramos ukon 2 ½ lata sang gatas nga kondensada kada metro kwadrado.
5. Sab-ogan sang superphosphate ukon 0-18-0 nga Abono sa kadamu-on nga 8.3 gramos kada metro kwadrado ukon isa ka kutsara sa ibabaw sang azolla. Bandugon ini para matunaw sa tubig kag para indi masunog ang dahon sini.
6. Kon may makita nga sapat-sapat, butangan sang isa ka pudyot nga Carbofuran kada metro kwadrado para mapatay ang mga ini.
7. Kon ang imo talamnan sobra sa isa ka metro kwadrado, bandugon ang azolla sang silhig nga bukog kag laptahon agud magadasig ang pagtubo.
8. Pagkalipas sang 8 tubtub 12 ka adlaw ang bilog nga isa ka metro kwadrado nga gintamnan mapuno na sang sobra sa isa ka kilo nga preska nga azolla. Pwede na ini makuhaan sang similya para sa mga daku pa gid nga talamnan.

Source

The PSPC Extension Bulletin 1:2 July – September 1986. Mambusao, Capiz: Panay State Polytechnic College, 3. Adapted from Household Kitchen Garden Technology Brochure Volume 1 Series 1.